Қозыбаев университетінің грек-рим күресінен балуаны Ислам Евлоев Сауд Арабиясының Эр-Рияд қаласында өткен Ислам ынтымақтастық ойындарында күміс медаль иеленді. Спортшы 87 келі салмақ дәрежесінде  өнер көрсетіп, финалға шықты. Шешуші кездесуде ол ирандық Голамреза Фарохимен күресті. Шиеленісті жекпе-жекте ирандық күресші 6-0 есебімен жеңіске жетті, біздің спортшымыз халықаралық турнирде екінші орын алды. Бүгінде Ислам Евлоев  Дене шынықтыру және спорт кафедрасының ФКС-22-1 тобында оқиды. Студентіміз, Ислам ынтымақтастық ойындарына алғаш рет қатысып отыр. Ол 20 жасқа дейінгі Әлем чемпионаты U20 мен Азия жастар чемпионатында, Қазақстанның XIII жазғы универсиадасында және басқа да қазақстандық жарыстарда жеңіске жетті. Құттықтаймыз ! Жаңа спорттық жетістіктер тілейміз!

«Дене шынықтыру және спорт» кафедрасының аға оқытушысы, ҚР еңбек сіңірген жаттықтырушысы және спорт шебері Андрей Глывяк Қытайда өткен Әлем чемпионатында гір көтеруден үшінші орын алды. Беделді халықаралық жарыс 13-17 қараша аралығында Хайнингте өтті. Ұлттық құрамада облыс намысын біздің он төрт спортшы қорғады, олардың қатарында университетіміздің он түлегі Қазақстан құрамасы үшін медаль жеңді. Андрей Глывяк +85 келі салмақ дәрежесінде ардагерлер санаты мен  әуесқойлар арасында бақ сынасты. Ол екі сайыста да қола медаль ұтып алды. Ұлттық  құраманың жаттықтырушысы Андрей Ярославович спортшыларды чемпионатқа дайындауға белсене атсалысты. Жаттықтырушылар мен түлектерімізді құттықтаймыз! Жарайсыздар!

Қозыбаев шаңырағында Халықаралық студенттер күнінде  Talk show форматында кездесу өтті. Ашық интерактивті диалог құрылып, «Student story» және «KU talks» подкасттарының жүргізушілері мен кейіпкерлері, жиналған топтас студенттермен әңгімелесті. Бұл шараны ҚХА кафедрасы журналистика және әлеуметтік ғылымдар кафедрасымен және университеттің маркетинг кеңсесімен бірлесіп ұйымдастырды. Іс-шара студенттік медиа ортаның ең жарқын қатысушыларын біріктірді, олар университеттегі жеке оқиғаларымен, көзқарастарымен бөлісті. Подкаст жүргізушілері Шыңғыс Шитканов пен Олжас Мұхтар студенттермен медиа өнімдерді жасау тәжірибелері, түсірілім кезіндегі қызықты сәттер, подкасттардың жасалу жолы, қарым-қатынас дағдыларын құру, шығармашылық пен ұйымшылдық туралы айтты. Подкаст қатысушыларының арасында музымен айналысатын балалар, спортшылар, белсенділер, Халықаралық кампус студенттері болды. Қызықты әңгімелесуден кейін подкаст жүргізушілері қызықты сұрақтар қойған студенттерге кәдесыйлар мен сыйлықтар табыстады.

Қозыбаев университеті Эстония президенті Алар Каристің қатысуымен Ректорлар форумында еліміздің түкпір-түкпірінен келген 19 университеттің қатарында болды. Бұл іс-шара ғылым, білім беру саласында Қазақстан мен Эстония арасындағы мәдени байланыстарды нығайту үшін маңызды алаңға айналды. Форумға Қазақстанның ҒЖБ министрі Саясат Нұрбек, вице-министр Гүлзат Көбенова және Эстонияның білім және зерттеу вице-министрі Райво Вьенталь, сондай-ақ жетекші қазақстандық және эстония университеттерінің басшылары қатысты. Қозыбаев университетін Басқарма Төрағасы-Ректор Ербол Исақаев таныстырды. Спикерлер жоғары білім беру саясатының бағыттарын, институционалдық стратегияларды, оқыту мен оқуға инновациялық тәсілдерді, сондай-ақ бірлескен зерттеу орталықтары мен зертханаларын құруды талқылады. Цифрландыруды дамыту және білім беру процесіне жасанды интеллект технологияларын енгізу саласындағы ынтымақтастыққа ерекше назар аударылды. Өткен жылы біз Эстония Республикасының Қазақстан Республикасындағы Төтенше және Өкілетті Елшісі Яап Орды Қозыбаев университетінде қабылдадық. Ол қызметкерлермен кездесіп, студенттерге ашық дәріс оқыды. Мұның бәрі ынтымақтастықты нығайтуға бағытталған маңызды қадамдар. Біз Эстонияның білім беру мекемелері мен компанияларымен серіктестікке ашықпыз, мәдени алмасуға, бірлескен зерттеулер мен академиялық жобаларға, академиялық ұтқырлық және тағылымдамадан өту шараларына дайынбыз.

Бүгін білім ордамыз көрнекті ғалым, академик, тарих ғылымының тарланы Қозыбаев Манаш Қабашұлының 94 жылдығына орай еске алу кешін өткізді. Манаш Қабашұлы Қазақстандағы тарихи ғылымның дамуына орасан зор үлес қосты. Оның зерттеулері, іргелі еңбектері қазіргі заманғы қазақстандық тарихи ойдың қалыптасуының маңызды бөлігіне айналды. Еске алу шарасы қатысушылар мен қонақтардың, академик Манаш Қозыбаевтың мүсініне гүл шоқтарын қойып, оның ғылыми мұрасына құрмет көрсетуден бастау алды. Өз кезегінде бұл тарихи санамыздың жаңа тұжырымдамасын толықтырып, тарихқа бір шолу жасауға мүмкіндік береді. Тыңдаушылар алдында сөз алған «Қоғамдық келісім» КММ жетекшісі Кемел Оспанов ЖОО-ға Манаш Қабашұлының есімін беру туралы мағұлматпен бөлісті: «Университетіміздің көрнекті ғалымдары облыстық ономастикалық комиссияның мүшелері : В. Зайберт, Ф. Сим, К. Қалиев, Н. Белецкая болды. Құжаттарды заңды түрде дұрыс рәсімдеуге және негізгі ғылыми негіздемелерді анықтауға үлкен мән берілді. Әрбір құжат аймақтық мамандармен мұқият қаралды. Келесі қадам - министрліктер мен ведомстволардың бекітуі болды. Бұл жүйе біршама уақытты қажет етті. Күрделі жұмыстың шарықтау шегі, 2003 жылдың 30 мамырында СҚУ-ға академик Манаш Қозыбаевтың есімі берілді деген Үкімет қаулысы шықты. Бұл біздің өңір үшін маңызды кезең болды» Салтанатты жиынның келесі бөлімі 6 оқу ғимаратында жалғасын тапты. Бүгінде Солтүстік Қазақстан университеті зор мақтанышпен академик Манаш Қозыбаев атындағы ұлы есімді иеленіп отыр. Университет қабырғасында оның ғылыми мұрасы тек тарих ретінде емес, қазіргі заман білімінің үлгісі ретінде өмір сүріп келеді. Соның дәлелі ретінде, заманауи үлгідегі кеңістіктің ашылуы өтті. Бұл алаң білім алушылардың жиі бас қосуларына ықпал етіп, түрлі форматтағы кездесулер өткізуге қолайлы. Бүгінде біздің жоғары оқу орны ғалымның есімін ұлықтап, кейінгі ұрпаққа дарыту мақсатында Манаш Қозыбаев атындағы дәрісхананы ашып отыр. Дәрісханадағы екінші қабаттағы коворкинг аймағы студенттердің жан-жақты білім алуына, ғалымның артынан қалдырып кеткен мұрасымен танысуға мүмкіндік береді. Қазірде, жаңартылған кеңістік пен атаулы дәрісхана студенттер мен келуші қонақтардың үлкен қызығушылығын тудырады. «Сөнбейді Манаш жұлдызы» атты көрме кеңістігі ұйымдастырылды. Мұнда Манаш Қозыбаевтың өмірі, қызметі мен еңбектері жайлы  мәліметтер, естелік фото суреттер берілген. Сонымен қатар, Республикалық ғылыми-зерттеу байқауының жеңімпаздарына алғыс хаттар табысталып, оқуда, ғылымда, спортта және қоғамдық жұмыста үздік нәтиже көрсеткен 15 студент «Манаш Қозыбаев атындағы шәкіртақыны» иеленді. Атаулы аудиторияда Халықаралық кампус студенттері үшін Манаш Қозыбаевтың өмірі мен қызметіне арналған алғашқы дәріс өтті.

Халықаралық студенттер күніне орай Қозыбаев білім алушылары арасында спартакиада өтті. Құрамалар волейбол және тоғызқұмалақ спорт түрлерінен өзара бақ сынасты. Екі күн ішінде әр факультеттердің және Халықаралық кампустың спортшылары ойын шеберліктерін көрсетті. Тоғызқұмалақтан командалық нәтижелері: 1-орын: ПФ 2-орын: ТжӘИ 3-орын: ТЭҚФ Жеке есепте жеңімпаздар: Әуелбай Ерсұлтан (ФКС-м-25 тобы) және Елубаева Саида (НОИП (KZ-US)-23-k тобы). Ұлдар арасындағы волейбол жарысына 8 факультет командасы қатысып, Педагогикалық факультет жеңіске жетті. ИСТФ күміс медальдарды жеңіп алды. Ал АФ үшінші орынды иеленді. ПФ студенті Павел Сороколадов турнирдің ең үздік ойыншысы атанды. ИСТ факультетінің білім алушысы Алан Калипенов ең үздік шабуылшы атағын жеңіп алды, ал Агротехнологиялық факультеттің студенті Әділ Оспанов ең үздік қорғаушы-шабуылшы атағына ие болды. Оларға естелік сыйлықтар табысталды. Ойындар тартысты өтіп,ал көрермендер өз құрамаларын қызу қолдап отырды. Спартакиада студенттерге спорттық қабілеттерін көрсетуге мүмкіндік береді және факультет аралық байланыстарды нығайтады. Барлық белсенді қатысушыларды құттықтаймыз!

Университетте сапа апталығы аяқталды. Биыл ол «Жасанды интеллект: мүмкіндіктер, сын-қатерлері және болашақ білім сапасы» атты өзекті мәселеге арналды. Іс-шара аясында университетте қазақ, орыс және ағылшын тілдерінде оффлайн және онлайн режимінде дөңгелек үстел, викториналар, пікірталастар, семинарлар, конференциялар шамамен 30 іс-шара өткізілді. Қатысушылар арасында тек университетіміздің студенттері мен оқытушылары ғана емес, сонымен қатар СҚО жұмыс берушілері мен серіктестері, Омбы мемлекеттік педагогикалық университетінің (Ресей) ғалымдары және ҚР Ұлттық ұлан академиясының курсанттары да болды . Жасанды интеллект бойынша білім беру әдістеріне, зерттеу жобаларына және жасанды интеллект құралдарын пайдалануға ерекше назар аударылды. Студенттер шеберлік сабақтары мен ашық практикалық жаттығулар арқылы кәсіби дағдыларын шыңдады. Сондай-ақ, білім алушылар «Жаратылыстану ғылымдарының дамуындағы заманауи үрдістер» атты ғылыми мақалалар көрмесіне қызығушылық танытты.

Ұлт ұстазы -Ахмет Байтұрсынұлының туған күні мен Қазақстан халқының тілдері күні аясында ҚР ҒЖБМ және «Халықаралық «Қазақ тілі» қоғамы» ҚБ бірлесіп «Ұлттық диктант» жобасын бастады. Игі бастаманы қолдау мақсатында Қозыбаев университетінің оқытушылары, қызметкерлері мен студенттері жалпыұлттық диктант жазуға қатысып, қазақ тілінен жазу сауаттылығын көрсетті. Іс-шара екі бағытта өткізілді: ана тілі ретінде қазақ тілін меңгерген қатысушыларға Ахмет Байтұрсынұлының «Оқу жайы» мақаласынан үзінді және қазақ тілін екінші тіл ретінде меңгерушілерге «Отан» тақырыбындағы шағын шығарма пайдаланылды. Жаппай диктант жазуға барлығы 1000-нан аса адам қатысты. Қатысушылар мемлекеттік тілді меңгеру деңгейін тексеріп қана қоймай, оның мәртебесін арттыруға және ұлттық бірегейлік пен тілдік мәдениетті нығайтуға ат салысты. Мұндай дәстүрлі диктант жазу шаралары жастардың тіл мәдениетін жетілдіріп, мемлекеттік тілде сауатты жазу дағдысын қалыптастырады.

Қытай Халық Республикасының Қазақстандағы Елшілігінде «Солтүстік Қазақстан облысы-Қытай» атты алғашқы инвестициялық бизнес-форум өтті. Іс-шара екі елдің билік, бизнес және ғылыми қоғамдастық өкілдерін біріктіріп, тәжірибе алмасудың және серіктестік байланыстарды нығайтудың маңызды алаңына айналды. Форумға Қозыбаев университетінің Басқарма Төрағасы-Ректоры және Агротехнологиялық факультеттің деканы қатысты. Ербол Исақаев біздің ЖОО-ның солтүстік-батыс ауыл және орман шаруашылығы университетімен (ҚХР) сегіз жылдық ынтымақтастығының нәтижелері туралы айтып, академиялық және ғылыми тұрғыдан қол жеткізілген жетістіктерді атап өтті: бірлескен білім беру бағдарламаларын, ғылыми жобаларды және оқытушылар мен студенттер арасындағы алмасу шараларын жүзеге асыру. Серіктестіктің жаңа бастамасы Қозыбаев университетінің базасында Хэнань ауыл шаруашылығы инвестициялық тобымен бірлесіп, Қазақстан-Қытай ғылыми аграрлық орталығын құру болмақ. Орталықтың жұмысы қолданбалы зерттеулерді дамыту, инновациялық технологияларды енгізу және аграрлық саладағы ғылыми әзірлемелерді коммерцияландыру үшін бағытталады. Мұндай халықаралық форумдар ғылымды экономиканың нақты секторына ілгерілетуге ықпал етеді, тұрақты серіктестіктерді дамытады және бірлескен жобалар үшін жаңа мүмкіндіктер жасайды. Университетті ресми делегация құрамына қосып, өңірдің ғылыми-білім беру ынтымақтастығы мен халықаралық интеграциясын дамытуға бағытталған бастамаларға қолдау көрсеткені үшін Солтүстік Қазақстан облысы әкімдігіне алғысымызды білдіреміз.